Va Viškove se 13. 11. 2012. parićalo predstavljanje slikovnice Mucko Bucko na ravne, autorice Tatjane Udović.

Bilo je puno nastupi dece ča su došla predstavit svoje delo. Prvo nan je Dečji zbor Halubajčići lepo zakantal o svojoj matere, a za ten i poznatu pjesmu „Djeca nose svjetove na dlanu“. Nasupil je i DV Zvonimir Cviić, ki je prvi ugostil Muckota Buckota i pomogal ga ilustrirat. Pokazali su nan kako su se oni s Muckoton Buckoton igrali. DV Zvončica je izvel jedan lep igrokaz o pužice ka išće muža i novu kućicu, a potle su nan o pužu i zakantali. DV Loptica nan je zrecitiral pjesmu o plodovima jeseni.

Za ten su na red prišli čakavčići naše škole i pokazali kako su se igrali naši stari. Bilo je tu sačega: brojila, kolo – kolo – janca, Jež bez brageš i druge. Potle našeh učeniki na pozornicu se vrnul DV Loptica i otancal kolo na kantuneti Jelena i Majka preko mora Mare zvala.

Pred kraj programa su nas zabavili klaun Steve i njegov tukan Toni, a š njimi je bil i mađioničar. Si smo se va publike dobro nasmeli. Podelili su nan nekoliko baloni tako da imamo uspomenu na ovu večer. Za sam kraj nan je zakantal  zbor Zvona z Viškova.

Bilo je lepo. Si smo se zabavili i bilo bi lepo da se još ki put ovako okupimo.

Lucija Žužić